DR Congo – Kurahira kwa Tshisekedi: Abaperezida 18 baritezwe, hitezwe kandi imyigaragambyo
Muri Mutarama (1) 2019 Joseph Kabila (ibumoso) ahererekanya ubutegetsi na Tshisekedi mu muhango wo kurahira
Intumwa nkuru ya perezida wa DR Congo, Serge Tshibangu, yatangaje ko abakuru b’ibihugu 18, ba visi perezida babiri, n’abahoze ari abakuru b’ibihugu bane, bitezwe i Kinshasa kuri uyu wa gatandatu mu muhango wo kurahira kwa Perezida watowe Felix Tshisekedi.
Mu kiganiro n’abanyamakuru kuri Stade des Martyrs mu ijoro ryo kuwa kane, Tshibangu, wari kumwe na Patrick Muyaya umuvugizi wa leta, yavuze ko abo bategetsi 18 biganjemo ab’ibihugu bya Africa “bamaze kwemeza ko bazitabira” uwo muhango.
Tshibangu yavuze kandi ko Joseph Kabila yatumiwe ubugira kabiri nk’uwahoze ari perezida ndetse nk’umusenateri ubuzima bwose wa DR Congo.
Kabila niwe wahererekanyije ubutegetsi na Tshisekedi mu myaka itanu ishize, gusa nyuma aba bagabo ntibongeye kuvuga rumwe aho nk’uwahoze ari perezida wa komisiyo y’amatora yavuze ko Tshisekedi yirengangije ibyo yari yarumvikanye na Kabila amaze kumugeza ku ntsinzi.
Kabila – udakunze kuvuga mu itangazamakuru – ntaremeza niba azitabira kurahira kwa mugenzi we Tshisekedi, bamwe mu banyamakuru muri DR Congo bavuga ko amakuru bavana ku bamwegereye avuga ko atazitabira uwo muhango kuko azaba ari muri Africa y’Epfo mu bijyanye n’impamyabumenyi y’ikirenga arimo kuhakorera.
Mu byitezwe cyane mu muhango wo kuri uyu wa gatandatu harimo indahiro ya perezida, ijambo rye nyuma yo kurahira, n’akarasisi ka gisirikare, nk’uko bivugwa na Patrick Muyaya.
Ni abahe bategetsi batumiwe?
Ahavuye isanamu, Patrick Muyaya/X
Serge Tshibangu (ibumoso) na Patrick Muyaya babwiye abanyamakuru iby’uyu muhango wo kuri uyu wa gatandatu
Ibiro ntaramakuru bya Congo, ACP byasohoye urutonde ruriho abakuru b’ibihugu 22 batumiwe, barimo nka Evariste Ndahishimiye w’u Burundi, Brice Oligui wa Gabon, Cyril Ramaphosa wa Africa y’Epfo, Samia Suluhu wa Tanzania, Macky Sall wa Sénégal cyangwa Bola Tinubu wa Nigeria, William Ruto wa Kenya n’abandi.
Tshibangu avuga ko abakuru b’ibihugu 18 ari bo bemeje ko bazitabira.
Ibiro bya perezida w’u Burundi byasohoye itangazo kuwa kane bivuga ko Perezida Ndayishimiye n’umugore we bazitabira uyu muhango i Kinshasa.
Kuri uru rutonde rw’abakuru b’ibihugu batumiwe rwatangajwe na ACP, ku mpamvu zishobora kumvikana kuri buri benshi, ntihariho perezida w’u Rwanda Paul Kagame.
Hashize igihe hari ubushyamirane hagati y’ubutegetsi bw’ibihugu byombi bushingiye ku ntambara mu burasirazuba bwa DR Congo.
Kuri urwo rutonde kandi ntihabonekaho Perezida Yoweri Museveni wa Uganda.
Mu bahoze ari abakuru b’ibihugu batumiwe, uretse Joseph Kabila, hatumiwe na Uhuru Kenyatta (Kenya), Jakaya Kikwete (Tanzanie) na Hery Rajaonarimampianina (Madagascar).
Kurahira n’imyigaragambyo
Kuri uwo munsi wo kurahirira manda ya kabiri kwa Tshisekedi abakandida perezida batatu batsinzwe bahamagariye abayoboke babo kuzajya mu mihanda ya Kinshasa no mu gihugu hose bakamagana uyu muhango n’intsinzi ya Tshisekedi.
Mu kiganiro n’abanyamakuru kuri internet, Moïse Katumbi, waje ku mwanya wa kabiri n’amajwi 18%, Martin Fayulu wabaye uwa gatatu n’amajwi 4.9% na Anzuluni Bembe wagize 0.8% basabye abantu kwitabira iyo myigaragambyo ari benshi.
Abo bakandida kandi bakomeje gusaba ko ibyavuye mu matora ya perezida biburizwamo kuko bavuga ko ari amatora “yaranzwe n’uburiganya bukabije”.
Patrick Muyaya yabwiye abanyamakuru ko ingamba z’umutekano zafashwe” kugira ngo iyo myigaragambyo “itaboneka nk’ubushotoranyi”.
Avuga kandi ko umutekano w’abatumiwe muri uyu muhanga uzarindwa kuva bakigera ku butaka bwa Congo.
Muyaya yaburiye abaturage ba Kinshasa kutazahungabana kuko muri uwo muhango hazaraswa imizinga 21 nk’umuhango w’irahira rya perezida.
Crédit: Lien source
Les commentaires sont fermés.