South Africa vs DR Congo match time, team news and oda tins to know about di Afcon 2023 third place game

South Africa and DR Congo must bounce back from dia semi-final disappointment as dem jam each oda for di Africa Cup of Nations third place play-off match.

Bafana Bafana bin score late to take Nigeria to extra time in dia last game, and den survive a few minutes wit ten men to force penalties. Dem fail to convert some of dia penalty kicks, as di Super Eagles reach di final wit 4-2 shootout win.

As for DR Congo, dia game against di hosts Ivory Coast end afta 90 minutes, na Sebastian Haller score di only goal of di match.

DR Congo bin finish third for Afcon for 2015, dem beat Equatorial Guinea on penalties, while dis na di first time South Africa go play for dis stage since dem win Tunisia for 2000 to carry bronze.

Kick off for di Afcon third place match na 9:00pm West African time on Saturday for di Felix Houphouet Boigny Stadium for Abidjan.

Grant Kekana dey suspended for South Africa afta im collect red card against Nigeria, Nkosinathi Sibisi and Siyanda Xulu na di oda options to partner Mothobi Mvala for defence.

Meanwhile for DR Congo, Gael Kakuta bin return from injury for dia semi-final game but manage only 45 minutes.

Yoane Wissa dey expected to start again, before im go return to im club Brentford, to try to win im place back for di English Premier League team.

South African defender, Siyanda Xulu say im dey happy wit di team performance and di progress dem show for dia time for di tournament.

“We bin get our own goal as a team. We bin wan go as far as we fit. We know our quality and especially from di coach Im be pesin wey always believe in us as a team. To go dis far bin dey our plan. To reach di semi-final na dream. Yes, we bin wan carry di cup, but we no fit, but we dey proud of our performance” Xulu tell tori pipo.

DR Congo defender, Dylan Batubinsika tell im teammates to stay calm ahead of dia game against South Africa.

« We bin dey disappointed for a while because we bin get di potential to go all di way, » di Saint-Etienne player tell tori pipo.

« I feel say we get mixed feelings wit di elimination, but our ambition na to go get dis medal. We get to stay focused to stay to at least finish for third place, » E tok.

Im add say, ”We get to dey proud of wetin we don do so far, …, we for like to go all di way but dat no be di case.