DR Congo: ONU iramagana igitero cy’ibisasu byakomerekeje abasirikare bayo 8
Ingabo za MONUSCO zagiye zishinjwa na M23 gufatanya n’ingabo za leta mu mirwano gusa zo zivuga ko akazi kazo ari ukurinda abasivile
Umuvugizi w’igisirikare cya DR Congo muri Kivu ya Ruguru yatangaje ko barindwi (7) mu bo mu ngabo za MONUSCO bari mu birindiro byabo i Sake bakomerekejwe n’ibisasu by’inyeshyamba za M23.
Umukuru wa MONUSCO muri Congo, madamu Bintou Keita, yasohoye itangazo ryamagana igitero ku ngabo za ONU ariko ntawe ashinja kurasa kuri izo ngabo.
Keita yatangaje ko muri icyo gitero hakomeretse ingabo umunani (8) harimo umwe wakomeretse mu buryo bukomeye.
Imirwano hagati y’ingabo za leta n’umutwe wa M23 i Sake n’inkengero zayo yubuye kuwa gatandatu mu gitondo nyuma y’igihe kigera ku byumweru bibiri nta mirwano ikomeye iba muri ako gace.
Umutwe wa M23 ntacyo uravuga ku byo ushinjwa n’ingabo za leta ko ari wo warashe kuri izo ngabo za ONU.
Bintou Keita yatangaje ko biteguye “gufasha iperereza ryose rigamije kugaragaza ababikoze imbere y’ubucamanza bwo mu gihugu cyangwa mpuzamahanga”.
Nubwo ibi byabaye, MONUSCO ivuga ko izakomeza gufatanya n’ingabo za leta mu bikorwa byo gucunga umutekano w’abaturage.
Umutwe wa M23 uvuga ko ingabo za MONUSCO zifasha ingabo za leta mu rugamba barwana.
Imirwano yabaye kuwa gatandatu i Sake yatumye abandi bantu bahunga
Umuvugizi w’igisirikare cya Congo mu ntara ya Kivu ya Ruguru, Colonel Ndjike Kaiko yavuze ko abakomerekeye muri icyo gitero ari ingabo ziva muri Guatemala n’umwe wo mu Buhinde.
Biragoye kumenya neza ibyabaye mu mirwano yo kuwa gatandatu i Sake n’inkengero zayo, gusa amakuru aremeza ko ingabo za leta n’imitwe ya Wazalendo bafatanya bakigenzura Sake.
Imirwano ikomeye iheruka kubera i Sake mu kwezi gushize yatumye abantu ibihumbi za mirongo bava mu byabo bahunga berekeza i Goma.
Mu kwezi gushize gusa abantu 250,000 bahunze imirwano hagati y’izi mpande zombi kandi benshi bahungiye i Goma, nk’uko byatangajwe n’umwe mu ntumwa nkuru za ONU wasuye aka gace akavuga ko abantu bari mu kaga gakomeye cyane.
Ramesh Rajasingham ukuriye ibiro bishinzwe ubutabazi muri ONU yasuye umujyi wa Goma mu minsi ishize, muri iki cyumweru yatangaje ko uyu mubare w’impunzi mu gihe gito gutyo ari ibintu batigeze babona mbere.
Mu itangazo rye, Bintou Keita ahamagarira “imitwe y’inyeshyamba yose guhagarika ubugizi bwa nabi ku baturage”, akanasaba “M23 by’umwihariko, gushyira intwaro hasi ikubahiriza amasezerano ya Luanda”.
Crédit: Lien source
Les commentaires sont fermés.