RD Congo: »Nta burenganzira mufise bwo guhemukira igihugu » – umukuru w’ingabo

On Avr 16, 2024

Ahavuye isanamu, Screenshot_Youtube

Insiguro y’isanamu, Jenerali Christian Tshiwewe ntavuga ingene izi ntwazangabo zahemukiye igihugu

Haciye isaha 1

Umukuru w’ibiro bikuru vy’igisirikare ca Repubulika ya Demokarasi ya Congo amenyesha ko hari intwazangabo z’igisirikare n’igipolisi zatawe muri yompi zagirizwa guhemuka.

Mw’ijambo yashikirije ihuriro rusangi ry’abasirikare n’abapolisi ku mugwa mukuru Kinshasa ku wa mbere, Jenerali Christian Tshiwewe, yabasavye kugendera indahiro yabo: “Ntuze wigere uhemukira Congo”.

Ashikirije ibi mu gihe igihugu gihanganye n’imirwi yitwaje ibigwanisho mu buseruko bw’ico gihugu, cane cane umuhari M23 wigaruriye uturere tutari duke muri Rutshuru na Masisi mu ntara ya Kivu ya Ruguru.

Yababwiye ko ari muri iyo ntumbero umukuru w’igihugu Félix Tshisekedi yategetse ko hategurwa idefire yo “gushigikira ingabo zihanganye n’umwansi ku wa 30 z’ukwa gatandatu”. Iyo tariki isanzwe ariwo munsi Congo ihimbaza intahe yo kwikukira yaronse mu 1960.

Jenerali Tshiwewe yasavye abasirikare n’abapolisi kwiyamiriza abantu bose, harimwo n’abanyaporitike, borondera kubahimiriza ngo bifatanye n’inyeshamba zihanganye n’igisirikare ca reta.

Ati: “Ivyo bobemerera vyose, kirazira guha amatwi abarondera kubagumura. Ico mwomenya, inyeshamba zirashobora kwigarurira igisagara kimwe canke bibiri, ariko impera n’imperuka ingabo za reta zizotegerezwa kubibohoza kandi aba bantu ntaho bazoba bagifise bahungira”.

Jenerali Tshiwewe yabwiye iri huriro ry’abasirikare n’absapolisi ko izi ntwazangabo zafatuwe mu gisagara ca Lubumbashi, umugwa mukuru w’intara ya Haut-Katanga, hamwe no ku mugwa mukuru w’igihugu, Kinshasa.

Agabisha ko uwuzoramuka ahemukiye igihugu atazokwihanganirwa.

Ati: “Nta burenganzira ufise bwo guhemukira igihugu cawe. Uwuzobikora azovyishura mu buryo ubu canke ubundi. Nta nyungu ufise yo kwifatanya n’umwansi”.

Yateye akamo igisirikare n’igipolisi gukorana mu runani mu ntumbero yo gukingira abanyagihugu n’amatungo yabo.

Mw’iri jambo yashikirije ingabo z’igisirikare n’igipolisi, Jenerali Tshiwewe ntavuga ingene izi ntwazangabo zahemukiye igihugu . Ntanavuga igitigiri c’abafashwe ingene kingana.

Haraciye imisi igisirikare ca Congo gitaye mu mvuto abasivire bane barimwo abashingamateka babiri b’intara ya Kivu ya Ruguru, bagirizwa gukorana n’umuhari M23 mu bikorwa vya maneko no kuwuronderera abanywanyi mu gisagara ca Goma.

Crédit: Lien source