Blinken yasabye Kagame na Tshisekedi ‘gukura abasirikare ku mupaka’
Ahavuye isanamu, X/PRÉSIDENCE RDC, PAUL KAGAME/FLICKR
Minisitiri w’ububanyi n’amahanga w’Amerika yasabye Perezida Tshisekedi (ibumoso) na Perezida Kagame gukura ingabo ku mupaka w’ibihugu byombi
Minisitiri w’ububanyi n’amahanga w’Amerika Antony Blinken avuga ko yavuganye na Perezida w’u Rwanda na Perezida wa Repubulika ya Demokarasi ya Congo ku mwuka w’ubushyamirane ku mupaka w’ibihugu byombi.
Matthew Miller, umuvugizi wa minisiteri y’ububanyi n’amahanga y’Amerika, avuga ko ku wa mbere Blinken yavuganye kuri telefone na Perezida Paul Kagame na Perezida Félix Tshisekedi buri umwe ukwe, bavugana « ku bintu byifashe nabi no ku makuba ajyanye n’imibereho arimo kuba nabi kurushaho » ku mupaka w’ibihugu byombi.
Mu itangazo, Miller avuga ko Blinken yabwiye Kagame na Tshisekedi ko ashyigikiye « umuti unyuze mu nzira ya diplomasi [ubwumvikane] ku bushyamirane hagati y’ibi bihugu bibiri ».
Yanashishikarije buri ruhande « gufata ingamba zo guhosha uko ibintu bimeze, harimo no gukura abasirikare ku mupaka ».
Blinken avuze ibi nyuma yuko kuva mu ntangiriro y’Ukwakira (10) imirwano yongeye kubura hagati y’umutwe w’inyeshyamba wa M23 n’ingabo za DR Congo (FARDC) n’imitwe yitwaje intwaro izishyigikiye, nyuma y’amezi atandatu yari ashize muri rusange hari agahenge.
Ibiro bya Perezida w’u Rwanda byavuze ko Kagame yongeye kubwira Blinken ko ashyigikiye cyane gahunda zikomeje zo ku rwego rw’akarere zigamije « kuzana amahoro n’ituze » muri DR Congo no mu karere.
Nta cyo uruhande rwa leta ya DR Congo ruratangaza ku mugaragaro kuri icyo kiganiro Perezida Tshisekedi yagiranye na Minisitiri Blinken.
Ku wa mbere, amakuru yavugaga ko imirwano ikaze yakomeje, M23 yisubiza uduce tumwe turi mu birometero bikeya uvuye mu mujyi wa Goma, umurwa mukuru w’intara ya Kivu ya Ruguru, mu burasirazuba bwa DR Congo.
Bitangazwa henshi, nko muri raporo y’inzobere z’Umuryango w’Abibumbye, ko inyeshyamba za M23 zifashwa n’u Rwanda, ikirego u Rwanda rwakomeje guhakana.
Mbere yaho muri Kanama mu 2022, mu ruzinduko yagiriye mu bihugu byombi, Blinken yari yasabye Kagame na Tshisekedi guhosha umwuka w’ubushyamirane no gutuma umutekano ugaruka mu burasirazuba bwa DR Congo.
Intambara hagati ya M23 na FARDC yongeye kubura kuva mu mpera y’umwaka wa 2021.
Crédit: Lien source
Les commentaires sont fermés.