DR Congo: Umunyamakuru Stanis Bujakera yakatiwe gufungwa amezi atandatu
Ahavuye isanamu, CPJ AFRICA/ X
Stanis Bujakera (uboneka kuri iyi foto) yarezwe gutangaza inkuru itari ukuri ku iyicwa ry’umunyapolitiki utavuga rumwe n’ubutegetsi
Umunyamakuru uzwi cyane muri Repubulika ya Demokarasi ya Congo Stanis Bujakera yakatiwe gufungwa amezi atandatu, ariko ashobora gufungurwa mu masaha ari imbere, nkuko ikinyamakuru akorera kibivuga.
Bujakera yafunzwe kuva ku itariki ya 8 Nzeri (9) mu 2023, icyo cyemezo cyo ku wa mbere cy’urukiko rwo mu murwa mukuru Kinshasa gisobanuye ko yarangije kumara icyo gihe afunze.
Urukiko rwamuhamije gukwirakwiza amakuru y’ibihuha no gukoresha inyandiko mpimbano, rumukatira gufungwa amezi atandatu no kuriha ihazabu y’amadolari 400 y’Amerika (angana na 516,000Frw).
Urubuga rw’amakuru Actualité.cd akorera rwo muri icyo gihugu rwavuze ko rwamaganye icyo gihano yakatiwe kandi ko umuyobozi wungirije warwo azajuririra icyo cyemezo cy’urukiko.
Ku itariki ya 8 y’uku kwezi, umushinjacyaha Serge Bashonga yari yamusabiye gufungwa imyaka 20 ku birego byo gukwirakwiza inyandiko mpimbano zijyanye n’ubutasi bwa gisirikare ku rupfu rw’umunyapolitiki utavuga rumwe n’ubutegetsi Chérubin Okende.
Ku itariki ya 13 Nyakanga (7) mu mwaka ushize, umurambo wa Okende – wari uwo mu ishyaka Ensemble Pour La République rya Moïse Katumbi – bawusanze mu modoka ye mu gitondo i Kinshasa ahitwa Limeté, warashwe amasasu, nyuma y’umunsi ishyaka rye ritangaje ko yashimuswe n’abitwaje intwaro.
Ubushinjacyaha bwakomeje kuvuga ko Okende yiyishe.
Stanis Bujakera ni n’umunyamakuru ukorera mu buryo budahoraho ibinyamakuru mpuzamahanga nka Jeune Afrique cyo mu Bufaransa n’ibiro ntaramakuru Reuters byo mu Bwongereza.
Itabwa muri yombi rye mu mezi atandatu ashize ryamaganwe bikomeye mu gihugu no mu mahanga, ndetse haba n’imyigaragambyo imbere y’ambasade ya DR Congo i Buruseli mu Bubiligi.
Ni iki yarezwe gutangaza?
Bujakera yarezwe kwandikira Jeune Afrique inkuru ishinja ba maneko wa Congo kwica Okende, amezi arenga gato atatu mbere yuko haba amatora ya perezida yatsinzwe na Félix Tshisekedi wari usanzwe ku butegetsi.
Okende yahoze ari Minisitiri wo gutwara abantu n’ibintu, yegura mu Kuboza (12) mu 2022. Ubwo yapfaga yari umudepite akaba n’umuvugizi w’ishyaka Ensemble Pour La République rya Katumbi.
Yarezwe gukwirakwiza amakuru atari ukuri ajyanye n’urupfu rwa Okende. Bujakera yakomeje guhakana ibyo aregwa.
Muri Nzeri mu mwaka ushize, Jeune Afrique yavuze ko ihagaze kuri iyo nkuru yatangaje ku itariki ya 31 Kanama (8) uwo mwaka.
Reuters yatangaje ko iyo nkuru ya Jeune Afrique yari irimo ko raporo y’imbere igenewe abakozi y’urwego rw’igihugu rw’ubutasi rwa Congo yari yashinje ba maneko ba gisirikare kuba bishoboka ko bagize uruhare mu iyicwa rya Okende.
Jeune Afrique yari yasabye ko arekurwa, ivuga ko atari we wanditse iyo nkuru kandi ko nta zina rye ryari riyiriho. Reuters na yo yasabye ko Bujakera arekurwa.
Abategetsi bo muri Congo bacyemanze ubuziranenge bw’iyo nkuru, mu kwezi gushize bavuze ko Okende yiyambuye ubuzima bwe.
Umuryango uharanira uburenganzira bwa muntu Human Rights Watch wari wavuze ko urubanza rwa Bujakera rushingiye ku mpamvu za politiki, na Perezida Tshisekedi yumvikanishije ko Bujakera yazize icyo Tshisekedi yise « ubucamanza burwaye ».
Umuryango uharanira uburenganzira bw’abanyamakuru ku isi, Committee to Protect Journalists, wari wasabye ko Bujakera « arekurwa aka kanya kandi nta mananiza ».
Crédit: Lien source
Les commentaires sont fermés.